Termiz davlat universitetida talaba-yoshlarning jismoniy salomatligini mustahkamlash, sog‘lom turmush tarzini keng targ‘ib qilish hamda sportga bo‘lgan qiziqishini oshirishga alohida e’tibor qaratilmoqda. Universitetda talabalar uchun sport bilan muntazam shug‘ullanish, bo‘sh vaqtini mazmunli tashkil etish va o‘z sport mahoratini rivojlantirish uchun zarur sharoitlar yaratilgan. Universitetda futbol, voleybol, basketbol, yengil atletika, tennis, stol tennisi, suzish, kurash, dzyudo, boks, og‘ir atletika, gandbol, shaxmat va boshqa sport turlari bo‘yicha mashg‘ulotlar hamda sport to‘garaklari faoliyat olib boradi. Talaba-yoshlarning sportga bo‘lgan qiziqishini yanada oshirish maqsadida universitet miqyosida turli sport musobaqalari, spartakiadalar, “Talabalar ligasi”, “Yangi O‘zbekiston talabalari olimpiadasi” kabi keng ko‘lamli sport tadbirlari muntazam tashkil etib kelinmoqda. Bunday musobaqalar talabalarda jamoaviylik, iroda, intizom, sog‘lom raqobat va g‘alabaga intilish kabi fazilatlarni shakllantirishga xizmat qiladi.
TerDUda sport bilan shug‘ullanuvchi iqtidorli talabalarni qo‘llab-quvvatlash, ularning sport mahoratini oshirish hamda viloyat, respublika va xalqaro miqyosdagi musobaqalarda munosib ishtirok etishlari uchun imkoniyatlar yaratilmoqda. Universitetda tahsil olayotgan sportchi talabalar turli nufuzli musobaqalarda universitet sharafini munosib himoya qilib kelmoqda.
Universitetda zamonaviy sport infratuzilmasini rivojlantirishga ham katta e’tibor qaratilib, talabalar va professor-o‘qituvchilar foydalanishi uchun sport zallari, tennis korti hamda fitnes mashg‘ulotlari uchun imkoniyatlar yaratilgan.
Sport va sog‘lomlashtirish yo‘nalishidagi ushbu ishlarning asosiy maqsadi — jismonan sog‘lom, faol, irodali va barkamol yoshlarni tarbiyalash, ularning bo‘sh vaqtini mazmunli tashkil etish hamda universitetda sog‘lom va faol hayot tarzini yanada keng qaror toptirishdan iborat.
Sport sohasida erishilgan natijalar:
2025 yil 1 yanvar holatiga 1 ta “Sport klubi” faoliyat koʻrsatgan boʻlsa, hozirgi kunda professional futbol, futzal hamda gandbol klublari tashkil etilib, rasmiy klublar soni 4 taga yetdi. 2025 yilda sport klublariga 3,2 mld. soʻm miqdorida mablagʻ ajratildi. Hozirda TerDU professional futbol jamoasi Proligada, TerDU futzal klubi 1-Ligada boʻlsa, TerDU gandbol klubi hamda TerDU voleybol jamoasi Oliy ligada ishtirok etmoqda. 2026-yil davomida barcha sport klublari va sport yoʻnalishi uchun 10 mlyard. soʻm mablagʻ ajratildi.
2026 yilda Respublika OTM talabalalari oʻrtasida sportning 9 ta turi boʻyicha oʻtkazilgan “Talabalar ligasi” musobaqalarida gandbol -erkaklar - oltin, qizlar – bronza, kurash boʻyicha 5 ta oltin, 2 ta bronza umum jamoa hisobida birinchi oʻrinni, yengil atletika boʻyicha 1 ta kumush, 5 ta bronza medallar bilan umumjamoa hisobida uchinchi oʻrin qoʻlga kiritildi.
Maʼlumot uchun: Bu natijalar bilan TerDU respublika barcha OTMlari orasida umumjamoa hisobida Oʻzbekiston jismoniy tarbiya va sport universitetidan keyingi 2-oʻrinni egalladi. Oʻtgan yili ham universitet Respublika boʻyicha 2-oʻrinni egallagan edi).
“Yangi Oʻzbekiston talabalalari olimpiadasi” musobaqalari Respublika final bosqichida universitet jamoasi futbol boʻyicha bronza, yengil atletika boʻyicha 3 ta kumush, 4 ta bronza medallarini qoʻlga kiritdi.
Umuman, sport boʻyicha 2026 yilning 6 oyi mobaynida talabalar tomonidan jami Oʻzbekiston chempionatlarida 110 ta (26 ta oltin, 35 ta kumush, 49 ta bronza), xalqaro musobaqalarda 21 ta medal (3 ta oltin, 10 ta kumush, 7 ta bronza) medallar qoʻlga kiritildi.
Ushbu taʼlim yoʻnalishlarida futbol boʻyicha Oʻzbekiston terma jamoasi sardori Eldor Shomurodov, terma jamoa aʼzolari Asilbek Jumayev, Abdugʻofur Haydarovlar, shuningdek, turli sport yoʻnalishlari boʻyicha 23 nafar Oʻzbekiston terma jamoalarda mamlakatimiz sharafi himoya qiluvchi sportchilar tahsil olmoqda.
